Tsakure
Wannan nazari ya ƙunshi taƙaitaccen
bayani a kan waƙar Asharalle ne da kuma tsokaci a kan turakun waƙoƙin
wasu makaɗan Asharalle na Jihar Katsina. An yi amfani da ra’in
Waƙar
Baka Bahaushiya (WBB) ne wajen gina wannan nazari tare da fito da wasu turaku
a waƙoƙin wasu makaɗan
asharalle na jihar Katsina ta amfani da ra’in, waɗanda
suka haɗa da:
Turken yabo da na ta’aziyya da na zambo da na koɗa kai da
na faɗakarwa da na siyasa da kuma na soyayya.
Haka kuma an gina muradin wannan nazari ne domin gano yadda makaɗan
Asharalle suke amfani da fasaharsu wajen gina turakun waƙoƙinsu.
Ginshiƙan
hanyoyin da aka bi wajen aiwatar da wannan bincike su ne; tattaro bayanai da
matanonin waƙoƙin
makaɗan Asharalle, inda aka tattaro wasu waƙoƙin
makaɗan Asharalle, waɗanda
aka saurare su kuma aka juye su a rubuce. Haka kuma an tattaro bayanai ta
hanyar hira da wasu makaɗan Asharalle. Haka
kuma, nazarin ya ba da gudummawa wajen fito da hikimar da makaɗan
Asharalle suke amfani da ita yayin gina turakun waƙoƙinsu.
Fitilun
Kalmomi: Turke, Makaɗan Asharalle, Waƙar Baka Bahaushiya (WBB)
DOI: www.doi.org/10.36349/tjllc.2024.v03i01.038
author/Musa Abubakar Kurawa
journal/Tasambo JLLC | 15 February 2024 | Article 38
