Tsakure:
Aron kalmomi ba baƙon al'amari ba ne a al'ummar Hausawa a dalilin samun sauyi lokaci zuwa lokaci. Sau da yawa al'umma kan yi ƙirƙira ko su aro kalmomi daga wasu harsuna domin cikata rumbun kalmominsu. Wannan bincike ya nazarci waƙar Sa'idu Faru mai taken “Kana Shire Baban 'Yanruwa” wadda ya yi wa Sarkin Kudun Sakkwato Alh. Muhammadu Macciɗo. Manufa a nan, ita ce fito da kalmomin Larabci waɗanda mawaƙin ya yi amfani da su cikin waƙar, domin bayar da ‘yar gudummuwa a fannin nazarin harshen Hausa. An tattara bayanai ta hanyar sauraren waƙar da nazarin wasu ayyuka masu alaƙa da aikin da kuma tattaunawa da masana da ma'abota sauraren waƙoƙin Sa'idu Faru. An ɗora binciken bisa ra'in hulɗa tsakanin harsuna, na Greenberg (1962). Sakamakon binciken ya gano cewa Makaɗa Sa’idu Faru ya saƙa kalmomin aro talatin da biyu (32) daga Larabci a cikin ɗiyan waƙa goma sha uku (13) a cikin wannan waƙa. Bugu da ƙari takardar ta ayyana tasirin addinin Musulunci a kan mawaƙan Hausa wanda hakan ya yi tasiri wajen aron kalmomin Larabci a waƙoƙinsu, kuma makaɗa Sa'idu Faru ba a bar shi baya ba a nan.
Fitilun Kalmomi: Aro, Kalmomin Larabci, Waƙar Baka, Sa'idu Faru
DOI: www.doi.org/10.36349/tjllc.2024.v03i03.046
author/Sani Adamu & Hafizu Hadi
journal/Conference Proceedings | November 2024 | Article 46
