Tsakure:
Wannan maƙala ta yi ƙoƙarin lalubo wasu kalmomin karin-harshe a cikin wasu waƙoƙin marigayi makaɗa Sa’idu Faru tare da yin duba a kan zubinsu da ma’anoninsu idan aka kwatanta su da waɗanda akan yi amfani da su a Daidaitacciyar Hausa cikin sadarwar al’ummar Hausa ta yau da kullum. Marigayi Alhaji Sa’idu Faru ya yi amfani da karin-harshensa na Yamma a cikin wasu waƙoƙinsa a inda yakan nuna fasaharsa da ƙwarewarsa a harshe da ma nuna yankin da ya fito. Daga cikin hanyoyin bincike da aka yi amfani da su sun haɗa da kundayen bincike, bugaggun litittafai da kuma hanyar saurare, sannan an yi nazari tare da juyar sautin waƙa zuwa rubutu wanda aka fi sani da rubutun sauti ‘transcription’. Inda aka nazarci ‘Waƙar Shugaban Safun Gabas riƙa ƙwarai, Muhammadun Amadu Uban Zagi’ ta Sarkin Kudun Sakkwato Muhammadu Macciɗo. Bayan haka, an yi amfani da hanyar bincike ta karin harshe a fayyance, wato ta hanyar siffanta harshe. A ƙarshe, binciken ya gano yadda karin-harshe a mataikai daban-daban na tubalan nazirin harshe (kamar tsarin sauti da gudajin kalma da kuma ginin jumla) suka bayyana ƙarara a cikin waƙar baka, musamman wajen fahintar wasu tsofaffin kalmomi da kuma na fannu da nufin bunƙasa harshe da al’adun Hausawa. Haƙiƙa, ana sa ran wannan bincike zai yi ƙoƙarin ƙara wa masu nazari ƙwarin guiwa wajen gabatar da duk wani aikin bincike da ya shafi karin-harshe da nufin bunƙasa harshen Hausa.
DOI: www.doi.org/10.36349/tjllc.2024.v03i03.033
author/Abdullahi Bashir & Ali Usman Umar
journal/Conference Proceedings | November 2024 | Article 33
